काठमाडौं । एशियाली विकास बैंक (एडिबी) ले सरकारलाई विद्युत् प्रसारण तथा वितरण क्षमता अभिवृद्धि परियोजना कार्यान्वयनका लागि १५ अर्ब ४६ करोड रुपैयाँ सहुलियत ऋण उपलब्ध गराउने भएको छ ।
सो रकममध्ये करिब २१ लाख अनुदान र बाँकी ऋण दिने बैंकले जनाएको छ । सहायतासम्बन्धी सम्झौतापत्रमा आइतबार अर्थ मन्त्रालयमा आयोजित कार्यक्रममा अर्थसचिव शान्तराज सुवेदी र बैंकका निमित्त प्रमुख शरद भण्डारीले हस्ताक्षर गरे ।
यसै गरी परियोजना कार्यान्वयनसम्बन्धी समझदारीपत्रमा नेपाल विद्युत् प्राधिकरणका प्रबन्ध निर्देशक कुलमान घिसिङ र निमित्त प्रमुख भण्डारीले हस्ताक्षर गरे ।
परियोजनाअन्तर्गत काठमाडौं उपत्यकाको विद्युत् वितरण प्रणालीमा सुधार, प्रसारण लाइन निर्माण, बाह्रबिसे, लप्सीफेदी, खिम्ती र चापागाउँ क्षेत्रका ‘सब स्टेसन’को स्तरोन्नति गर्नाका साथै प्रसारण प्रणाली सुदृढ गरिनेछ ।
त्यसैगरी दक्षिण एशियाली उपक्षेत्रीय आर्थिक सहयोगअन्तर्गत व्यापार सहजीकरणका निम्ति भन्सार सुधार तथा आधुनिकीकरण कार्यक्रम कार्यान्वयन गर्न बैंकले दुई अर्ब १३ करोड ऋण सहायता उपलब्ध गराउने भएको छ ।
ऋण सहायतासम्बन्धी सम्झौता पत्रमा अर्थ मन्त्रालयको अन्तर्रा्ष्ट्रिय आर्थिक सहयोग समन्वय महाशाखाका प्रमुख बैकुण्ठ अर्याल र निमित्त प्रमुख भण्डारीले हस्ताक्षर गरे। उक्त रकम आगामी पाँच वर्षभत्रमा उपयोग गरिसक्ने अर्थ मन्त्रालयले जनाएको छ । रासस
लेखकको बारेमा
प्रतिक्रिया