अख्तियार दुरूपयोग अनुसन्धान आयोगले ट्रान्सफर्मर खरिद प्रकरणमा प्राधिकरणका उच्च अधिकारीलाई कारबाही गरेपछि कुनै पनि सामान खरिदका लागि प्राधिकरणको नेतृत्व खरिदका लागि तयार देखिएका थिएनन् ।
काठमाडौं । लामो समयदेखि मिटरको अभावमा विद्युत् सेवा पाउन नसकेका ग्राहकका लागि खुसीको खबर छ । नेपाल विद्युत् प्राधिकरणले मिटर प्राप्त गर्न नसकेका ग्राहकलाई वितरण गर्नका लागि ७३ हजार ४ सय ५० थान मिटर ल्याएको छ । भदौ अन्त्यसम्ममा मिटर वितरण सुरु गरिने र निवेदन दिएर प्रतिक्षामा बसेका ग्राहकलाई क्रमैसँग वितरण गर्दै जाने प्राधिकरणका अधिकारीहरुले बताएका छन् । नयाँ घर बनाउने तथा विभिन्न कारणले मिटर बिग्रेर मिटर कुरिरहेका ग्राहकले छिट्टै आउन लागेका दसैँअघि नै बिजुलीको मिटर पाउनेछन् ।
प्राधिकरणका अनुसार मिटर केही दिन पहिले रक्सौल भन्सारमा आइपुगेको छ । केन्द्रीय भण्डार हेटौडा मा आवश्यक परीक्षणपछि मिटर ग्राहकलाई बाँड्ने तयारी गरिएको छ ।
सेवाग्राहीहरूले विभिन्न कार्यालयमा मिटरको माग गर्दै विगत एक वर्ष पहिले निवेदन दिए पनि प्राधिकरणले आन्तरिक समस्याका कारण वितरण गर्न सकेको थिएन । प्राधिकरणसँग जगेडामा मिटर नभएका कारण नयाँ ग्राहकलाई प्रदान गर्न नसकेको र बिग्रेका मिटरसमेत साट्न सकेको थिएन ।
प्राधिकरणका निमित्त कार्यकारी निर्देशक रामचन्द्र पाण्डेका अनुसार प्राधिकरणले ल्याएको मिटरमा सिङ्गल फेजका ६० हजार र थ्री फेजका १३ हजार ४ सय ५० वटा छन् ।
मुलुकमा प्रत्येक वर्ष दुई लाख थानभन्दा बढी मिटरको आवश्यकता भए पनि प्राधिकरणले मिटर किन्न नसक्दा मिटरको अभाव भएको थियो । प्राधिकरणको जिन्सी शाखाका अनुसार हालसम्म पाँच लाखभन्दा बढी मिटरको माग रहेको छ । मिटर पाउँ भन्दै ग्राहकले प्राधिकरणका विभिन्न कार्यालयदेखि प्रधानमन्त्री तथा मन्त्रिपरिषद् कार्यालय, हेलो सरकार र ऊर्जा मन्त्रालयमा समेत निवेदन दिएका थिए ।
अख्तियार दुरूपयोग अनुसन्धान आयोगले ट्रान्सफर्मर खरिद प्रकरणमा प्राधिकरणका उच्च अधिकारीलाई कारबाही गरेपछि कुनै पनि सामान खरिदका लागि प्राधिकरणको नेतृत्व खरिदका लागि तयार देखिएका थिएनन् ।
गत फागुनमा चीनको मिडिल साउथसँग भएको सम्झौताअनुसार यही सेप्टेम्बरको अन्त्यसम्ममा थप एक लाख मिटर तथा नोभेम्बरको अन्त्यमा ६० हजार मिटर नेपाल आइपुग्ने बताइएको छ । प्राधिकरणले दुई लाख २० हजार मिटर ल्याउन लागेको छ ।
लेखकको बारेमा
प्रतिक्रिया