काठमाडौं । केन्द्रीय निक्षेप प्रणाली (सीडीएस) तोकिएकै समयमा लागू गर्न लगानीकर्ताले माग गरेका छन् । सीडीएस प्रणाली लागू गर्नका लागि पयाप्त समयसीमा नभएको भन्दै सिडिएस एण्ड क्लियरिङ लिमिटेड (सीडीएससी)ले ६ महिना समय थप गर्न नेपाल धितोपत्र बोर्डमा निवेदन दिएपछि लगानीकर्ताले आफुहरुलाई त्यो अस्विकार्य हुने बताएका हुन् ।
नेपाल इन्भेन्टर्स फोरमले विज्ञप्ती जारी गरी लगानीकर्ता अभौतिक सेयर कारोबारका लागि पूर्ण तयार रहेको र तोकिएको समयमा कार्यान्वयन नगरे लगानीकर्तामा निराशा आउने बताएको छ ।
फोरमका अध्यक्ष राजकुमार तिमिल्सिनाले प्रेस वक्तब्य जारी गरी लागु गर्ने कामबाट सीडीएससी एकाएक पछाडि हट्न खोजेको भन्दै कडा आपत्ती जनाएका छन् ।
विज्ञप्तीमा सीडीएस कार्यान्वयनलाई ६ महिना पछि धकेल्ने सीडीएससीको प्रयास लगानीकर्ताहरुका लागि अश्वीकार्य भएको उल्लेख गरिएको छ । सीडीएससीको नियमावलीमा सीडीएस संचालनमा आएको ६ महिनापछि अभौतिक सेयरहरुको मात्र कारोबार हुने स्पष्ट व्यवस्थाको बर्खिलाप सीडीएससीले कार्तिक २ गतेदेखि डिम्याट सेयरहरु मात्र कारोबार गर्न नसकिने भन्दै फेरि म्याद थपको निबेदन दिनु लगानीकर्ताको हित विपरितको कार्यसमेत भएको उल्लेख छ ।
सीडीएससीले २१ दिने सूचना अनुसार सीडीएसमा आवद्ध हुन नआउने कम्पनीहरुलाई कारबाही गर्नुको सट्टा नेपाल स्टक एक्सचेन्ज र सीडीएससी आफै निरीह बन्दै पछाडि हट्दा धितोपत्र बजारमा नकारात्मक असर पर्ने र लगानीकर्ताहरुमा निराशा उत्पन्न हुने फोरमले बताएको छ ।
फोरमले सर्वसाधारण लगानीकर्ताले धमाधम हितग्राही खाता खोलेर डिम्याट सेयर कारोबारमा सहभागी हुने तत्परता देखाईरहेको जिकिर गर्दै कातिर्क २ गतेबाटै सबै कम्पनीको अभौतिक शेयर कारोबार हुनुपर्ने र सीडीएससीले धितोपत्र बोर्डमा दिएको म्याद थपको निवेदन अघि बढाउनु नहुनेमा जोड दिएको छ ।
सीडीएससीले धेरै कम्पनीहरु सेयर अभौतिक गराउने सम्झौता गर्न नआएको र धेरै सेयरहरु अभौतिकीकरण गर्न असंभव रहेको भन्दै धितोपत्र बोर्डमा सीडीएस लागु गर्ने समय कार्तिक २ बाट ६ महिना पछि सार्न निवेदन पेश गरेको छ ।
सीडीएससीले असोज २० गतेबाट बाणिज्य बैंक तथा कात्तिक २ गतेबाट सबै कम्पनीहरुको डिम्याट सेयर मात्र कारोबार गर्ने सयम तालिका तय गरेको थियो ।
लेखकको बारेमा
प्रतिक्रिया