काठमाडौं । संस्कृति, पर्यटन तथा उड्डयन मन्त्रालयका सचिव सुरेशमान श्रेष्ठले नेपाल पर्यटन बोर्डका कायममुकायम कार्यकारी प्रमुख अधिकृत (सिइओ) सुवास निरौलालाई निलम्बित गरेपछि पर्यटन प्रबद्र्धनका लागि ढोका खुलेको बताएका छन् ।

नेपाल पर्वतारोहण संघ (एनएमए) को शनिबार ४१औँ वार्षिकोत्सवको अवसरमा सचिव श्रेष्ठले निरौलालाई निलम्बित गरेर बोर्डको विवाद सुल्झनुले नेपालको पर्यटन प्रवर्द्धनको सुरुवातका लागि कोसेढुङ्गा सावित भएको बताएका हुन् ।

पर्यटन क्षेत्रमा सरकार र निजी क्षेत्रको दुवै हातेमालो गरेर अघि बढ्नु पर्ने सचिव श्रेष्ठको भनाई थियो । नयाँ गठन भएको पर्यटन विभागलाई पनि नीजी क्षेत्रसँग सहकार्य गरी अगाडी बढाइने बताउँदै सचिव श्रेष्ठले पर्यटन बोर्ड नीजी क्षेत्रको थलो भएको बताए ।

पूर्व पर्यटन राज्यमन्त्री याङ्किला शेर्पाले पर्यटन बोर्डको समस्या समाधानका लागि मन्त्रालयले गरेको कडा निर्णयले पर्यटन क्षेत्रमा सुधारको बाटो देखिएको बताएकी छिन् ।

संयुक्त पर्यटन समन्वय समिति (जेटीसिसि)का संयोजक रमेश धमलाले पर्यटन प्रवर्द्धनका लागि सरकार र निजी क्षेत्रबीचको सहकार्य जरुरी बता उँदै आफूहरु हरपल सरकारसँग सहकार्य गर्न तत्पर रहेको बताए ।

लेखकको बारेमा

अर्थटुडे