काठमाडौं । अर्थमन्त्री डा.रामशरण महतले राजनीतिक खिचातानीमा धेरै समय खेर फालिसकिएकोले अवको समय विकास निर्माणको कामका लागि खर्चिने बताएका छन् । 
उनले साधन र स्रोत नभएका संसारका अन्य मुलुकहरुले तीब्र बृद्धि हासिल गरीसक्दा पनि नेपाल भने राजनीतिक खिचातानीमा समय खर्चिरहेको चर्चा गर्दै अव विकास निर्माणका काम जुट्नुपर्ने बताए ।
शनिवार माइक्रोबायोलोजी समाजले माइक्रोबायोलोजी सम्वन्धी पाँचौ सम्मेलनको उद्घाटन गर्दै उनले संबिधान जारी नहुन्जेलसम्म विकास निर्माणलाई रोकेर बस्ने स्थिति नभनएको र विकास निर्माणका कामहरुलाई तिब्रता दिन आवश्यक रहेको समेत स्पष्ट पारे ।
उनले बर्षेनी विश्वविद्यालयहरुबाट अध्ययन पूरा गरेर श्रम बजारमा प्रवेश गर्ने युवाहरुलाई रोजगारी दिन सक्ने ताकत कृषि र पर्यटन क्षेत्रमा रहेको बताउँदै मन्त्री डा.महतले भने—“ भौगोलिक विविधता र प्राकृतिक सम्पदाहरुको उपयोग गरी रोजगारी सिर्जना गर्न सकिन्छ । ”
जलस्रोतको भण्डार भएपनि राजनीतिकरणले अगाडि बढ्न नसकेकोदावी गर्दै डा.महतले जलबिद्युतको विकासका लागि विदेशी पुँजी र बजार आवश्यक पर्छ । पुँजी र बजारको लागि सम्झौताहरु गर्नासाथ देशै बेच्यो भनेर हल्ला गर्ने प्रबृत्ति छ । यस्तो प्रबृत्तिलाई निरुत्साहित गर्नुपर्ने आवश्यकता रहेको स्पष्ट पारे ।
मन्त्री महतले माइक्रोबायोलोजीका क्षेत्रमा काम गर्नेहरुले आफ्नो संभावनाको उजागर गर्नुपर्ने आवश्यकता औल्याउँदै नतिजामुखी आकर्षक प्रस्ताव ल्याएमा सरकार सहयोग गर्न तयार रहेको आश्वासन दिए ।
सो कार्यक्रममा नास्टका उपकुलपति प्रा डा.जीवराज पोखरेलले विज्ञान र प्रविधिको क्षेत्रमा नेपालमा युवाहरुको आकर्षण बढ्दै गएको आवश्यक पर्ने जनशक्ति तयार रहेको बताए ।
त्यसैगरी कार्यक्रममा समाजका अध्यक्ष रजनी मल्लले सरकारले विज्ञान र प्रविधिको क्षेत्रमा हुने अनुसन्धानलाई सरकारले सहयोग गर्नुपर्नेमा जोड दिएकी थिइन् ।
लेखकको बारेमा
प्रतिक्रिया