केही रकम घरको खोपीमा र केही बारीमा गाडेको अवस्थामा भेटियो
काठमाडौं । मेगा बैंक ठगी प्रकरणमा बैंककै दुई ब्रान्च म्यानेजर सहित चार जना पक्राउ गरेको छ । पक्राउ पर्नेहरुमा राजेन्द्र पाण्डे, शम्भु बहादुर थापा, प्रविण पाण्डे र प्रदिप पाण्डे रहेका छन् ।

उनीहरुले नक्कली हस्ताक्षर गरी मेगा बैंकमा रहेको टुरिजम डेभलपमेन्ट बैंकको खाताबाट २ करोड ९ लाख ९० हजार रुपैयाँ ठगीमा बैंककै कर्मचारीहरु संलग्न रहेको पाइएको छ ।
मेगा बैंकको न्यूरोड शाखाबाट २०७० माघ १२ गते ९ लाख ९० हजार रुपैयाँ र १३ गते राष्ट्रिय वाणिज्य बैंक भोटाहिटी शाखाबाट २ करोड रुपैयाँको चेक क्लियरिङ गरी जम्मा २ करोड ९ लाख ९० हजार रुपैयाँ ठगी भएको थियो ।

धादिङस्थित मेगा बैंकका तत्कालिन ब्रान्च म्यानेजर राजेन्द्र पाण्डेको मूख्य योजनामा बैंकमा ठगी भएको प्रहरीको दावी रहेको छ । त्यसैगरी, चार वर्षदेखि मेगा बैंकको कान्तिपथ ब्रान्च म्यानेजरको रुपमा कार्यरत शम्भु बहादुर थापा ठगी प्रकरणको योजनाकार तथा सहभागी भएको पनि प्रहरीको दावी रहेको छ ।

धादिङ सलाङकै प्रविण पाण्डेले भने उनीहरुले बनाएको योजना कार्यान्वयन गरेको र प्रदिप पाण्डेले बैंक ठगीमा सहयोग गरेको प्रहरीले जनाएको छ । प्रविण र प्रदिप शिक्षण पेशामा आवद्ध रहेका छन् ।

यसरी भयो बैंक ठगी

महानगरी प्रहरी अपराध अनुसन्धा महाशाखाका अनुसार २०७० मंसिर ९ गते मेगा बैंक कान्तिपथ शाखाबाट अनाधिकृत ढंगबाट टुरिजम डेभलपमेन्ट बैंकको नामको १० थान चेक जारी गरिएको थियो । तत्कालीन अवस्थामा चेक लिन आउने ब्यक्ति मुख्य योजनाकार राजेन्द्र पाण्डेका भाई प्रविण पाण्डे थिए । तर उनले अल्फाविटा कलेजको विद्यार्थी परिचयपत्रको नक्कल राखेको पाइएको प्रहरीको दावी छ ।

ग्राहक सेवा केन्द्रका कर्मचारीले उक्त फर्म माथी शंका लागी चेक दिन नमान्दा बैंकका कान्तिपथ शाखाका तत्कालिन मेनेजर शम्भुबहादुर थापाले कर्मचारीलाई चेक जारी गर्न आदेश दिएपछि चेक इस्यु भएको पाइएको छ । यसबाट थापा पनि संलग्न भएको प्रहरीले दावी गरेपनि थापालाई पाण्डे दाजुभाईले फसाएको उनका परिवारको दावी रहेको छ ।
थापाको आर्थिक अवस्था पनि राम्रो र २३ वर्ष नविल बैंकमा काम गरेका व्यक्ति भएकोले उनले त्यस्तो काम गर्न नसक्ने उनका साथीहरु बताउँछन् ।

यसैगरी २०७० पुस ९ गते राष्ट्रिय बाणिज्य बैंक शाखा कार्यालय टेकु र भोटाहीटीमा पनि नक्कली नामबाट खाता खोलिएको थियो । त्यस्तैगरी २०७० माघ १२ गते संजय ढकालको नामबाट प्रविण पाण्डेले मेगा बैंकको न्युरोड शाखाबाट टुरिजम डेभलपमेन्ट बैंकका मनोज खड्का र मोहन प्रसाद पाण्डेकोे दस्तखत गरि ९ लाख ९० हजार भुक्तानी लिएका थिए । त्यसको भोलिपल्टै प्रविण पाण्डेले संजय ढकालको रा.बा.बैक भोटाहीटी शाखाको खातामा चेक क्लिएरिङ्गको माध्यमबाट दुई करोड जम्मा गरेका थिए ।

पक्राउ अभियुक्त प्रविण पाण्डेका अनुसार सम्पुर्ण कुराको ब्यवस्थापन राजेन्द्र, प्रविण र शम्भु थापा मिलि गरेका र पाण्डेले मेगा बैंकका खातावालाहरुको विवरण प्रविण पाण्डेलाई उपलब्ध गराएका थिए । सोही विवरण प्रयोग गरि निज प्रविण पाण्डेले नक्कली कागजातहरु तयार गरेका थिए ।

कहाँ फेला पर्यो रकम ?

२०७१माघ ७ गते प्रहरीले गोंगबुस्थित प्रविण पाण्डे र प्रदिप पाण्डेको डेराबाट धमिराले खाएको अवस्थाको नगद दश लाख १५ हजार पाँच सय रुपैयाँ फेरा पारेको थियो सोही आधारमा थप खोजतलास गर्दा माघ ८ गते धादिङको सलाङस्थित पाण्डेको घर खोपीमा माटोले टालेको अवस्थामा तथा बारीमा गाडिएको अवस्थामा गन्न नसकिने नोटका बण्डलहरु फेला परेको प्रहरीले जनाएको छ ।

लेखकको बारेमा

अर्थटुडे