काठमाडौं । नेपाल एयरलाइन्सले यही फागुन १३ गतेदेखि नयाँ जहाज एयरबसबाट दिल्लीमा नियमित उडान सुरु गर्दै छ । 
सो अवसरमा निगमले नेपाली यात्रुहरुलाई ७ हजार ८४ रुपैयाँमा नयाँदिल्ली उडाउने भएको छ । यो करसहित एकतर्फी प्रवद्र्धनात्मक भाडादर हो । दुइतर्फी भाडदर भने करसहित १५ हजार १ सय ७७ रूपैयाँ तोकिएको निगमले जानकारी दिएको छ ।
विदेशी यात्रुहरुका लागि भने निगमले प्रतियात्रु ८ हजार २ सय ३० रुपैयाँ तोकेको छ । निगमको दिल्ली उडानले यात्रुहरुलाई निकै राहत पुग्ने अपेक्षा गरेको गरिएको छ । निगमका अनुसार विहान ८ बजे काठमाडौंबाट दिल्लीका लागि र १०ः४० बजे दिल्लीबाट काठमाडौंका लागि उडान हुनेछ ।
निगमले दिल्लीमा प्रत्येक सोमबार, बुधबार, शुक्रबार र शनिबार उडान गर्ने बताएको छ । १५८ सिट क्षमता भएको एयरबसमा १५० वटा इकोनोमी र ८ वटा बिजनेस सिट रहेका छन् ।
माघ ८ गते भित्राइएको एयरबस ‘ए३२०—२००’ जहाजको दिल्ली उडान पहिलो व्यवसायीक उडान हुनेछ । अर्को एयरबस आएपछि निगमले दिल्लीमा दैनिक दुई उडान गर्ने तयारीमा छ । हाल दुईवटा बोइङबाट अन्तर्राष्ट्रिय उडान गरिरहेको निगममा दुईवटा एयरबस थप भएसँगै चारवटा जहाज पुग्नेछन् । यसैवीच, निगमले काठमाडौं क्वालालम्पुर उडानको एकतर्फी नयाँ भाडा (कर वाहेक) १४ हजार रूपैयाँ कायम गरेको जनाएको छ ।
बैंकक र हङ्गकङ्गमा पनि एयरबसबाट सेवा सुरू गर्ने जानकारी दिँदै निगमले यसबाट उडानको नियमितता हुनुका साथै विश्वसनीयता समेत बढ्ने अपेक्षा गरेको छ । अन्तर्राष्ट्रिय उडान गर्ने जहाजको संख्या ४ पुगेपछि निगमले ९ वटा गन्तव्यमा सातामा ५० वटा उडान गर्ने बताएको छ ।
लेखकको बारेमा
प्रतिक्रिया