काठमाडौं । नेपाल बैंकको सञ्चालक समितिले देवेन्द्रप्रताप शाहलाई प्रमूख कार्यकारी अधिकृत (सिइओ) नियुक्त गरेको छ । अर्थमन्त्रीको दवावमा शाहलाई प्रमूख कार्यकारी अधिकृत बनाइएको हो ।

विहिबार बसेको सञ्चालक समितिको बैठकले अथमन्त्री डा.रामशरण महत निकट शाहलाई सिइओमा नियुक्ति दिएको छ । सिइओको विषयमा सञ्चालक समितिमा तिव्रविवाद भएपछि गत तीनदिनदेखि नेपाल बैंकमा सिइओ नियुक्त हुन सकेको थिएन ।

बैंकमा सरकारले नियुक्त गरेका संचालकहरु शाहलाई नै सिइओ बनाउने अडानमा रहेपछि अन्ततः सञ्चालक समितिले शाहलाई नै सिइओ नियुक्त गरेको हो । शाह यसअघि बीमा समितिका अध्यक्ष र कृषि विकास बैंकका महाप्रबन्धक रही सकेका थिए ।

मंगलबार र बुधबार बसेको बैठकमा कसलाई सिइओ बनाउने भन्ने विषयमा सहमति नभएपनि विहीबार भने सरकारले नियुक्त गरेको संचालकले पेलेर निर्णय गराएका थिए ।

अन्य सञ्चालकहरुले भने १२ वर्षदेखि बैंकिङ क्षेत्रमा नै नरहेका व्यक्तिलाई ल्यायएर सिइओ बनाएको भन्दै विरोध गरेका छन् । बैंकलाई सुधार्ने भन्दा पनि १४ वर्ष अगाडिकै अवस्थामा फर्काउने खेल सुरु भएको असन्तुष्ट पक्षको आरोप छ ।

नेपाल बैंकको सिइओ छान्न बनेको छनौट समितिले शाहसँगै कुमार लम्साल र छबिराज पन्तको नाम सिफारिस गरेको थियो । लम्साल सानिमा तथा किष्ट बैंकको पूर्व सिइओ हुन् भने पन्त एसबिआई बैंकको प्रमुख जोखिम अधिकृत हुन् ।

शाहलाई विहीबार बेलुकी ६ बजे शपथग्रहण गराउने कार्यक्रम तय भएको छ । शाहले शुक्रबारबाट नै कार्यभार सम्हाल्ने छन् ।

लेखकको बारेमा

अर्थटुडे