काठमाडौं । नेपालको आन्तरिक लेखापरीक्षणलाई प्रभावकारी बनाउनुपर्ने सरोकारवालाहरुले जोड दिएका छन् । नेपाल चार्टर्ड एकाउन्टेन्ट्स संस्था (आईक्यान) र कन्फेडेरेशन अफ एसिएन एण्ड प्यासिफिक एकाउन्ट्सको संयुक्त आयोजनामा भएको दुई दिने सार्वजनिक क्षेत्र वित्तिय व्यवस्थापन सम्बन्धि अन्तर्राष्ट्रिय सम्मेलनमा सरकारी अधिकारीहरुले नै आन्तरिक लेखापरीक्षणलाई प्रभावकारी बनाउन आवश्यक रहेको बताएका हुन् ।

सार्वजनिक क्षेत्रलाई पारदर्शी बनाउन र प्रभावकारी ढंगले लेखापरीक्षण गराउन व्यवसायिक रुपमा लेखापरीक्षण गरिरहेका लेखापरीक्षकहरुको थप प्रभावकारी बनाउन सकिने आईक्यानका अध्यक्ष नरेन्द्र भट्टराईले बताए ।

सम्मेलन उद्घाटन क्रममा सरकारी अधिकारीहरुले सार्वजनिक क्षेत्रमा लेखापरीक्षणलाई थप प्रभावकारी बनाइनुपर्नेमा जोड दिएका थिए । हाल सार्वजनिक क्षेत्रमा अत्यन्त न्यून मात्रामा व्यवसायिक लेखापरीक्षण रहेको बताइएको छ ।

अध्यक्ष भट्टराईले दुई दिने अन्तर्राष्ट्रिय सार्वजनिक क्षेत्र वित्तिय व्यवस्थापन सम्बन्धि सम्मेलनले सार्वजनिक क्षेत्रमा व्यवसायिक लेखापरीक्षकको आवश्यकता महसुस गराउन सफल भएको पत्रकार सम्मेलनमा बताए ।

उनले सरकारी अधिकारीहरुबाट नै यस क्षेत्रमा व्यवसायिक लेखापरीक्षक आवश्यकता औल्याइएपछि हाल भईरहेका लेखापरीक्षकबाट त्यसको परिपूर्ती गराउन सकिने बताए ।

उनले प्रत्यक्ष वैदेशिक लगानी भित्र्याउन पनि सार्वजनिक क्षेत्रलाई पारदर्शी र प्रभावकारी बनाइनुपर्ने बताए । सार्वजनिक क्षेत्रमा व्यवसायिक परीक्षण प्रणालीको आवश्यकता महसुश भएकाले त्यसतर्फ केन्द्रित हुनुपर्नेमा जोड दिँदै उनले आन्तरिक लेखापरीक्षलाई बलियो नबनाएसम्म मुलुकको अर्थतन्त्र राम्रो हुन नसक्ने ठोकुवा गरे ।

सार्वजनिक क्षेत्रलाई पारदर्शी बनाउन सहि मान्छे, सहि स्थानमा भन्ने अवधारणा लागू गरिनुपर्नेमा पनि अध्यक्ष भट्टराईको जोड थियो । दुई दिने अन्तर्राष्ट्रिय सम्मेलनमा लेखापरीक्षण सम्बन्धि क्षेत्रीय एवं अन्तर्राष्ट्रिय स्तरका संभावित वित्त व्यवस्थापनका विषयमा विस्तृत छलफल भएको आईक्यानले जनाएको छ ।

सम्मेलन समापनका क्रममा विज्ञहरुले सन् २०२२ सम्म नेपाल अतिकम विकसित मुलुकबाट विकासोन्मुख राष्ट्रमा स्तरोन्नती हुनुको लागि पनि सार्वजनिक वित्त व्यवस्थापनलाई प्रभावकारी बनाइनुपर्नेमा पनि जोड दिएका थिए ।

सम्मेलनमा सहभागि २१ देशका ५० भन्दा बढि विदेशी लेखाव्यवसायी संस्थाका प्रतिनिधिहरुसँग सार्वजनिक वित्त व्यवस्थापनका विषयमा उनीहरुको मुलुकमा भईरहेको प्रयास र त्यसबाट नेपालले सिक्नुपर्ने माठका विषयमा गम्भिर छलफल भएको आईक्यानले जनाएको छ ।

सम्मेलनमा नेपालको तर्फबाट अर्थ मन्त्रालय बजेट महाशाखा प्रमुख सहसचिव बैकुण्ड अर्याल, पेफा सचिवालयका उपसचिव बाबुराम सुवेदी, उपमहालेखापरीक्षक बाबुराम गौतम लगायतले कार्यपत्र पस्तुत गर्नुभएको थियो । सम्मेलनका क्रममा विभिन्न मुलुकका प्रतिनिधिहरुसँग राउन्ड टेबल छलफल भएको पनि आईक्यानले जनाएको छ ।

लेखकको बारेमा

अर्थटुडे