काठमाडौं । जलबिद्युत लगानी तथा विकास कम्पनीको सेयर बाँडफाँड भएको छ । कम्पनीको विक्रि प्रबन्धक रहेको नागरिक लगानी कोषले सेयर आवेदन दिने सम्पूर्ण लगानीकर्तालाई कम्तीमा १० कित्ता पर्ने गरी बाँडफाँड गरेको हो ।

कोषले बुधबार एक कार्यक्रम गरी सेयर बाँडफाड गरेको हो । लगानीकर्ताहरुले न्युनतम १० कित्तादेखि अधिकतम १ लाख ४४ हजार ८ सय १८ कित्तासम्म सेयर पाएका छन् ।

साना लगानीकर्तालाई ११ दशमलव ४ प्रतिशत र सोभन्दा माथीका लगानीकर्तालाई २ दशमलव ९ प्रतिशतका दरले सेयर बाँडफाँड गरेको नागरिक लगानी कोषका प्रवक्ता सुशिलकुमार कार्कीले जानकारी दिए । पाँच सय कित्ता भन्दा कम आवेदन दिनेहरु साना लगानीकर्ताभित्र पर्दछन् ।

कम्पनीको १ लाख ९५ हजार ३ सय ३० जना साना लगानीकर्ता रहेका छन् भने १ लाख ९ हजार ४ सय ३१ जना ठूला लगानीकर्ताले आवेदन दिएको कोषले जनाएको छ ।

ठूला लगानीकर्तामा बैंक तथा वित्तीय संस्थाले भने ५० करोड रुपैयाँसम्मको आवेदन दिएका थिए । कुल ३ लाख ४ हजार लगानीकर्ताले ४३ अर्ब रुपैयाँभन्दा बढीको सेयर भरेका छन् ।

सेयर आवेदन दिएका लगानीकर्ताले आफूलाई सेयर नपरेको रकम एक हप्तापछि फिर्ता पाउने भएका छन् । धितोपत्र नियमावली अनुसार बाँडफाँट गरेको ५ दिनभित्र रकम फिर्ता गर्नुपर्ने भएपनि प्राविधिक विषय मिलाउन बाँकी भएकाले केही ढिलाई हुने छ ।

लगानीकर्तालाई विभिन्न ६ वटा बैंक मार्फत आफ्नो खातामा पैसा पाउनेछन् । जस अनुसार जनता बैंक, प्रभु बैंक, सिटिजन्स बैंक, लक्ष्मी बैंक, एनएमबी बैंक र बैंक अफ काठमाडौंमा खाता हुने लगानीकर्ताले खातामै पैसा फिर्ता पाउने छन् ।

लेखकको बारेमा

अर्थटुडे