काठमाडौं । आन्दोलनरत कर्मचारीहरुले विमा समितिको व्यवस्थापन पक्षले माग पूरा नगरेको भन्दै विहिबारदेखि अनिश्चितकालका लागि कामकाज ठप्प पारेका छन् ।
तीन सातादेखि लगातार आन्दोलन गरेपनि व्यवस्थापन पक्ष आफ्ना मागहरुलाई लिएर गम्भीर नभएको भन्दै आन्दोलनरत कर्मचारीहरुले अनिश्चितकालका लागि काम ठप्प पारेका हुन् । विभिन्न १३ बुँदे माग राखी असार ९ गतेदेखि समितिका कर्मचारीहरु आन्दोलनरत थिए ।

बीमा समिति कर्मचारी संघका अध्यक्ष शम्भु मिश्रका अनुसार समितिले आफ्ना मागहरु पुरा गर्न सकिने भएपनि वेवास्ता गरेका कारण कामकाज नै ठप्प पारेर आन्दोलन गर्न लागेको हो ।

कर्मचारीहरुले विनियमावली २०६८ मा भएको व्यवस्था लागू गर्नुपर्ने, बीमा ऐन २०४९ र बीमा नियमावली २०४९ परिमार्जन गर्नुपर्ने, समितिबाट न्यून प्रतिफल प्राप्त हुने गरी भएको लगानीको छानवीन गर्नुपर्ने लगायतका १३ बुदे माग अघि सारेका छन् ।

विमा समिति कर्मचारी संघले अघिल्लो शुक्रबारबाट पाँचौ चरणको आन्दोलनको घोषणा गरेको थियो । व्यवस्थापन र कर्मचारीबीचको लडाईँले समितिको सेवाबाट सरोकारवालाहरु भने बञ्चित भएका छन् । विमा समितिका अध्यक्ष फत्तेबहादुर केसीले कर्मचारीहरुले राखेका माग समितिले पूरा गर्न नसक्ने भएको बताए ।

लेखकको बारेमा

अर्थटुडे