काठमाडौं । बैंक तथा वित्तिय संस्थाहरुले घरजग्गामा लगानी बढाउन थालेका छन् । नेपाल राष्ट्र बैंकका अनुसार बैंक तथा वित्तिय संस्थाहरुले चालु आर्थिक वर्षको पहिलो दुइ महिनामा घर जग्गामा मात्र १८ अर्व २६ करोड रुपैयाँ कर्जा प्रबाह गरेका छन् ।

यो गत वर्षको सोही अवधिको तुलनामा २.७ प्रतिशतले बृद्धि हो । आर्थिक वर्ष २०७०÷७१ को पहिलो दुइ महिनामा सो क्षेत्रमा बैंक तथा वित्तिय संस्थाबाट १० अर्व रुपैयाँ मात्र लगानी भएको थियो ।

घर जग्गामा लगानी गरेकै कारण केही संस्थाहरु समस्यामा परेपछि राष्ट्र बैंकले घरजग्गामा लगानी गर्नका लागि वित्तिय संस्थाहरुलाई कडाई गरेको थियो । तर चालु आर्थिक वर्षको मौद्रिक नीति मार्फत घरजग्गामा लगानी गर्नका लागि वित्तिय संस्थाहरुलाई केही खुकुलो बनाएपछि सो क्षेत्रमा लगानी बढेको हो ।

घरजग्गासँगै बैंक तथा वित्तिय संस्थाको लगानी सवारी साधनतर्फ पनि बढेको छ । चालु आर्थिक वर्षको पहिलो दुइ महिनामा मात्र ति संस्थाले २ अर्व १९ करोड रुपैयाँ बराबरको भेकल लोन प्रबाह गरेका छन् ।

सुनमा लगानी गर्न भने ति संस्थाहरु धेरै अकर्षित देखिदैनन् । चालु आर्थिक वर्षको दुइ महिनाको तथ्याङ्क अनुसार सुनमा ८७ करोड रुपैयाँ मात्र लगानी भएको देखिन्छ । तर गत आर्थिक वर्षको सोही अवधिमा सो लगानी ३.४ प्रतिशतले बढेर ९८ करोड रुपैयाँ लगानी भएको थियो ।

लेखकको बारेमा

अर्थटुडे