काठमाडौं । विमा समितिले राज्यले प्राथमिकता दिएको क्षेत्रमा लगानी गर्नका लागि विमा कम्पनीहरुलाई पहिलो पटक छुट दिएको छ । समितिले विमा कम्पनीहरुको लगानीको सिमालाई थप व्यवस्थित र फराकिलो बनाउन सार्वजनिक गरेको नयाँ नीतिमा छुटको व्यवस्था गरेको हो । 

नीतिमार्फत विमा कम्पनीले पुँजी बजारमा पनि दीर्घकालिन लगानीका लागि बाटो खुल्ला गरिएको हो । नीतिपश्चात् विमा कम्पनीहरुले अव उत्पादनशील तथा राष्ट्रिय महत्वका क्षेत्रका साथै इन्भेष्टमेन्ट कम्पनीको सेयरमा र साधारण सेयरमा समेत लगानी गर्न पाउने छन् ।

समितिले नयाँ नीतिमा विमा कम्पनीहरुले १० प्रतिशतसम्म साधारण सेयरमा लगानी गर्न पाउने व्यवस्था गरेको छ । सो व्यवस्था पहिले ५ प्रतिशत सम्म मात्र रहेको थियो ।

बिमा कम्पनीहरुसँग लगानी योग्य कोष बढ्दै गएपछि त्यसलाई पूर्वाधार क्षेत्रमा समेत उपयोग गर्न नयाँ लगानी निर्देशन तयार पारिएको हो। अहिले मूख्यतया बिमा कम्पनीको लगानी कोष सरकारी ऋणपत्र र बैंकको निक्षेपमा लगानी हुँदै आएको छ। यसलाई फराकिलो बनाएर पूर्वाधार क्षेत्रमा पनि लगानी गर्न सकिने व्यवस्था गरिएको हो।

सो नितिमा विमा कम्पनीहरुले ५ प्रतिशत रकमको ५ प्रतिशतसम् उत्पादनशील वा राष्ट्रिय महत्वका क्षेत्रहरु जलविद्युत, स्वास्थ,शिक्षा, पर्यटन र कृषिमा आधारित कम्पनीको सेयरमा नै लगानी गर्न सक्नेछन् ।

कम्पनीहरुले कुल लगानी रकमको दुई प्रतिशतसम्म इनभेष्टमेन्ट कम्पनीको सेयरमा समेत लगानी गर्न पाउने व्यवस्था बिमा समितिले गरेको छ। गैरजीवन बिमा कम्पनीहरुले भने इन्भेष्टमेन्ट कम्पनीमा लगानी गर्न पाउँदैनन्।

लेखकको बारेमा

अर्थटुडे