बुटवल । भारतीय प्रधानमन्त्री नरेन्द्र मोदीको सुरक्षाका निम्ति तीनवटा जिल्लाका नाका बन्द गरिने भएको छ । १८ औ सार्क शिखर सम्मेलनमा सहभागी हुन नेपाल आउने क्रममा बुद्ध जन्मस्थल लुम्बिनी आउन लागेका प्रधानमन्त्री मोदीको सुरक्षाका लागि ति जिल्लाका नाका बन्द गर्न लागिएको हो ।

मोदी भ्रमणको बेला सुरक्षालाई मध्यनजर राख्दै भारतीय सीमाबाट आवागमनसमेत बन्द गर्ने रुपन्देहीका प्रमूख जिल्ला अधिकारी बालकृष्ण पन्थीले राससका बुटवल समाचारदाता भरत केसीसँगको कुराकानीमा बताए । रुपन्देही, नवलपरासी र कपिलवस्तु जिल्लाका नाका बन्द हुनेछन् ।

मोदीको भ्रमणहुनुभन्दा ८ घण्टा अगाडी सिमा बन्द गर्न नेपाल भारत सुरक्षा बैठकमा सहमति भएको हो । यस क्षेत्रमा प्रशासनले सवारीसाधन, मन्दिर, मस्जिद, गुम्बा पनि विशेष सुरक्षाको घेरामा राखेको छ। प्रहरीले यस क्षेत्रको मुख्य नाकाहरु कुकुरको सहयोगमा सुरक्षालाई कडा बनाएको छ ।

लुम्बिनीमा श्रीलङ्काका राष्ट्रपति महिन्द राजपक्ष मङ्सिर ९ गते र भारतीय प्रधानमन्त्री मोदी मङ्सिर १२ गते आउने तयारी छ। सरकारले मङ्सिर १२ गते हुने भारतीय प्रधानमन्त्रीको स्वागतका लागि ऊर्जामन्त्री राधाकुमारी ज्ञवालीलाई र श्रीलङ्काका राष्ट्रपतिको स्वागतका लागि युवा तथा खेलकुदमन्त्री पुरुषोत्तम पौडेललाई जिम्मेवारी दिएको छ। विशिष्ट पाहुनाको स्वागतका लागि यस क्षेत्रका रुपन्देही, कपिलवस्तु र नवलपरासीका सभासद्, पूर्वसभासद्, विभिन्न दलका प्रमुख, सङ्घसंस्थाका विशिष्ट व्यक्ति, सरकारी कार्यालयका प्रमख र सञ्चारकर्मीसमेत रहेको नागरिक अभिनन्दन तथा स्वागत समिति बनाइएको छ।

राजपक्ष र मोदीको भ्रमणको सुरक्षाका लागि विशिष्ट किसिमको एकीकृत सुरक्षा योजना बनाइएको अञ्चल प्रहरीप्रमुख गणेश केसीले जानकारी दिए। अहिलेदेखि नै भारतीय र नेपाली सुरक्षाकर्मीबीच सुरक्षाको छलफलसमेत भइरहेको छ।

लुम्बिनीमा विशिष्ट पाहुनाको हेलिकोप्टर अवतरण गर्न सुरक्षा निकायको अनुरोधमा तीन हेलिप्याड निर्माण गरिएका छन्। हेलिप्याडबाट मायादेवी मन्दिरसम्म पुग्ने सडक मर्मत गरिएको छ । लुम्बिनीलाई आकर्षक बनाउनाका लागि करिब डेढ करोड खर्चिएको छ।     राससका समाचारदाताको सहयोगमा

लेखकको बारेमा

अर्थटुडे